सुदूरपश्चिम रोयल्सले एनपीएल दोस्रो संस्करणको १८औँ खेलमा जनकपुर बोल्ट्सलाई ६ विकेटले पराजित गर्दै लगातार पाँचौँ जित दर्ता गरेको छ। १४६ रनको लक्ष्य पछ्याउँदै इशान पाण्डेको ५६ रन र विनोद भण्डारीसँगको ९२ रनको साझेदारीले टोलीलाई सहज जित दिलायो। हर्मित सिंह २५ र कप्तान दीपेन्द्र सिंह ऐरी १० रनमा अविजित रहे।
यसअघि टस जितेर ब्याटिङ गरेको जनकपुर बोल्ट्सले २० ओभरमा ८ विकेट गुमाएर १४५ रन जोडेको थियो। सञ्जय कृष्णमुर्थीले ५० रन बनाउँदै टिमलाई उकासे भने निकोल लोफ्टी इटोनले ३९ रनको योगदान दिए। सुदूरपश्चिमका लागि अभिनास बोहोरा ४ विकेटसहित चम्किए भने स्कट केगुइलिनले ३ र दीपेन्द्र सिंह ऐरीले १ विकेट लिए।
पाँच जितसँगै सुदूरपश्चिम रोयल्सको प्लेअफ यात्रासमेत प्रायः पक्का भएको छ। अघिल्ला चारै खेल जितेको सुदूरपश्चिम शीर्ष स्थानमै छ भने जनकपुरले भने अझैसम्म एक खेल पनि जित्न सकेको छैन। आइतबार काठमाडौँ गोर्खाज र कर्णाली याक्सबीच अर्को खेल हुने कार्यक्रम छ।
