दोस्रो नेपाल प्रिमियर लिग (एनपिएल) मा कर्णाली याक्सले चितवन राइनोजलाई १ सय ६७ रनको चुनौतीपूर्ण लक्ष्य दिएको छ। टस जितेर बलिङ रोजेको चितवनविरुद्ध कर्णालीले २० ओभरमा ३ विकेट गुमाउँदै १६६ रनको सुदृढ योगफल बनायो। विदेशी जोडी म्याक्स ओ’डाउड र प्रियंक पाञ्चलले उत्कृष्ट सुरुवात दिलाउँदै पहिलो पावरप्लेमा ५५ रन जोडे। पहिलो विकेटका लागि ६१ रनको साझेदारी गरेका उनीहरूमध्ये म्याक्स २० रनमा बोल्ड आउट भए। त्यसपछि क्रिजमा आएका मार्क वाटसँग मिलेर प्रियंकले थप ६३ रन जोडे। २८ बलमै अर्धशतक बनाएका प्रियंकले ७ चौका र ६ छक्का प्रहार गर्दै ९० रनको धुवाँधार इनिङ्स खेले।
अन्त्यतिर पवन सर्राफले १६ बलमा १ चौका र ३ छक्का सहित अविजित २७ रन जोडेपछि कर्णालीले ठूलो स्कोर तयार गर्न सफल भयो। नाझिबिल्लाह जर्डान ४ रनमा अविजित रहे। चितवनका सोहेल, सेफ जेब र रवि बोपराले समान एक–एक विकेट लिए। आजै अर्को खेलमा विराटनगर किंग्स र पोखरा एभेन्जर्स आमनेसामने हुँदैछन्।
